Sgeulachdan Dhòmhnaill Alasdair

Rugadh Dòmhnall Alasdair an 1919 an Garrabost, an sgìre An Rubha an Eilean Leòdhais, far an robh a dhachaigh airson trì fichead bliadhna mus do ghluais e a Steòrnabhagh.

Thàinig Bàrdachd Dhòmhnaill Alasdair a-mach an 1999. Bha leithid de dh'fhèill air an leabhar agus gu bheil Acair a-nis a' foillseachadh Sgeulachdan Dhòmhnaill Alasdair.

Tha na sgeulachdan mar a tha a' bhàrdachd - grinn agus ealanta. Tha iad air an snaigheadh teann, gun mòran leudachadh air facail, agus ceist no earball an cois gach tè. Tha e gad tharraing a-steach annta on fhior thoiseach agus cha leig e às thu gus am freagair thu dhut fhèin a' cheist aig deireadh na sgeòil, no co-dhiù gus an smaoinich thu air brìgh nan sgeul.

Ged a tha smaoin dhomhainn an cois gach sgeòil, tha an sgrìobhadh anns a bheil an smaoin air a suidheachadh gu math èibhinn.